Rama Wiwaha
Kacariyos, Prabu Rama punika sejatosipun dewa. Asmanipun inggih menika Wisnu. Piyambakipun manjanma dados manungsa tumurun saking kahyangan dhateng donya. Sadaya kala wau awit panyuwunipun para dewa sanesipun, amargi para dewa boten tentrem dipunganggu dening Nata Alengka inggih menika Dasamuka utawi Rahwana.
Ing salah satunggaling dinten, Prabu Rama tuwin Lesmana nembe ngumbara dhateng pundi-pundi, njajah dhusun nasak wana, dumugi nagari sanes. Nalika semanten nglangkumhi Nagari Widheha utawi Manthili. Ratu utawi rajanipun kaparingan asma Janaka. Kaleresan ing Nagari Manthili saweg ngawontenaken sayembara. Sinten ingkang saged menthang gandhewa pusaka kraton, badhe kapundhut mantu, pikantuk putranipun putri ingkang kaparingan asma Shinta.
Kathah ingkang dherek sayembara. Sadaya sami nyobi menthang gandhewa, sami ngedalaken karaosipun nanging boten sami kasil. Punapa malih menthang, njunjung kemawon boten kiyat. Nanging dumugi giliranipun Rama, gandhewa dipunjunjung lon-lonan, lajeng kapenthang kanthi gampil. Sakala gandhewa tugel tengah. Swantenipun gumludug, kados mbudhegaken talingan. Ingkang sami ningali manahipun sami gumun. Minangka bebungahipun sayembara, pramila Rama pikantuk Ayu Shinta.
Upacara wiwaha mawi cara agengan utawi rame-rame. Dangunipun ngantos pinten-pinten dinten. Sasampunipun anggenipun gadhah damel bibar, kekalihipun lajeng kaboyong saking Nagari Widhela/Manthili dhateng Nagari Kosala. Ing Nagari kasebat, penganten kekalih dipunsubya-subya mawi pahargyan mawarni-warni.
Sumber : Marsudi Basa lan Sastra Jawa kanggo SMP/ MTs Kelas IX
(Kapethik saka: crita Ramayana)
Tag :
cerita
0 Komentar untuk "Rama Wiwaha"